Өнөө үед дэлхий даяар мэдээллийн урсгал хязгааргүй, өрсөлдөөн асар ширүүн болжээ. Ийм нөхцөлд тухайн улсын үндэсний телевиз бол зөвхөн дотооддоо мэдээ, мэдээлэл түгээдэг байгууллага биш, харин улсын нэр хүндийг олон улсад төлөөлөх хамгийн чухал гүүр юм.

Үндэсний телевизийн үүрэг бол иргэдээ мэдээллээр хангах, соён гэгээрүүлэхээс гадна улсынхаа соёл, өв уламжлал, хөгжил дэвшлийг дэлхийд хүргэх явдал. Тиймээс ийм байгууллагыг татан буулгах бус, харин бодлоготой шинэчлэх, агуулгын чанарыг сайжруулах нь илүү зөв алхам юм.

ТАТВАР, ТАТААСЫН ОНОВЧТОЙ ЗОХИЦУУЛАЛТАЙ ХЭРЭГТЭЙ...

     Үндэсний телевиз нь арилжааны телевизүүд шиг ашиг олох зорилготой бус тул улсын санхүүжилт буюу татвар, татаас зайлшгүй шаардлагатай. Гэхдээ энэ дэмжлэгийг зөвхөн “мөнгө өгөх” хэлбэрээр бус, үр ашиг, хариуцлага, ил тод байдлыг хослуулсан тогтолцоо хэлбэрээр хэрэгжүүлэх нь чухал.

Тухайлбал, иргэдийн төлсөн татварын тодорхой хувийг үндэсний телевизийн нийгмийн үүрэгт хөтөлбөрүүд, хүүхдийн боловсрол, соёлын контент, гадаад сурталчилгааны ажлуудад зориулах боломжтой. Ингэснээр татвар төлөгчид өөрсдийн мөнгө хаашаа зарцуулагдаж байгааг ойлгоно, телевиз ч чанарт анхаарна.

УЛС ТӨРӨӨС ХАРААТ БУС БАЙДАЛ БА ИРГЭДИЙН ИТГЭЛ...

     Үндэсний телевизийг улс төрийн нөлөөнд автуулах нь түүний хамгийн том аюул. Улс төрийн эрх мэдэлтэй этгээдүүдийн суртал ухуулгын хэрэгсэл болбол, олон нийтийн итгэл бүрмөсөн алдагдана. Харин бие даасан, мэргэжлийн, шударга сэтгүүл зүй бол үндэсний телевизийн гол үнэт зүйл байх ёстой.

Үүнийг хангахын тулд:

• Удирдлагын томилгоог ил тод, олон нийтийн оролцоотой болгох

• Сэтгүүлчдийн хараат бус байдлыг хууль, дүрмээр хамгаалах

• Контентын бодлого нь улс төрөөс ангид, нийгмийн хэрэгцээнд нийцсэн байх
  зэрэг зарчмуудыг чанд мөрдөх шаардлагатай.

ШИНЭЧЛЭЛ БА ОЛОН УЛСЫН ХАРИЛЦАА: 

Технологийн дэвшил, дижитал эринд нийцэж үндэсний телевизүүд контентын чанар, олон улсын хамтын ажиллагаа, дижитал платформд нэвтрэх бодлогоо шинэчлэх хэрэгтэй. Олон улсын уралдаанд оролцох, хамтарсан бүтээл хийх, гадаад хэл дээр контент гаргах нь улсын нэр хүндийг өсгөж, гадаад хөрөнгө оруулалтыг татах чухал суваг болдог.

         Үндэсний телевиз бол улсын “соёлын элчин сайд”, “мэдээллийн нүүр царай” юм. Тиймээс татан буулгах бус, өөрийн үнэт зүйл, зорилго, хариуцлагаа шинэ түвшинд гаргах нь зүйтэй. Улс төрөөс ангид, иргэдийн дуу хоолойг илэрхийлж чаддаг, дэлхийд улс орноо таниулж чаддаг үндэсний телевизийг бий болгох нь үзэгчдээ татах, удаан хугацаанд оршин тогтнох боломж юм.