Монгол Улс ундны усны хомсдолын дараа байгаль орчны хамгийн ноцтой асуудалтай нүүр тулж байна. Энэ бол ой модны хомсдол, цөлжилт юм. Сүүлийн жилүүдэд уур амьсгалын өөрчлөлт, ган, хөрсний доройтол эрчимжиж, манай орны газар нутгийн 70 гаруй хувь нь цөлжилтөд нэрвэгдээд байна. Энэ бол зөвхөн байгалийн төдийгүй, эдийн засаг, хүн амын амьдралын чанарыг заналхийлсэн томоохон сорилт юм.

Ийм нөхцөлд Монгол Улсын Засгийн газраас эхлүүлсэн “Тэрбум мод” үндэсний хөдөлгөөн нь байгалиа сэргээх, ногоон хөгжлийн суурийг тавих ухаалаг алхам болсон. Гэвч мод тарих нь нэг өдрийн ажил бус, харин арчилгаа, усалгааг тогтмол хийж, ургуулах урт хугацааны хариуцлага гэдгийг иргэн бүр ухамсарлах ёстой. Байгаль дэлхий бидэнд хайрласан зүйлээ буцаан нэхэж байна. Хэрэв бид өнөөдөр хөрс, ус, мод ургамлаа хамгаалж чадахгүй бол маргааш амьдрах орчингүй болох аюул бодитой тулгарах болно. Монгол хүн бүрийн оролцоо, ухамсар, сэтгэл “Тэрбум мод”-ыг амжилтад хүргэнэ. Нэг мод тарьж ургуулах нь ирээдүйгээ хамгаалж буй хамгийн үнэ цэнтэй үйл хэрэг юм. Байгалиа хайрлах сэтгэл бол эх орноо хамгаалж буй хамгийн эрхэм үйл.
 

Өнөөдөр бид мод тарьж чадвал маргаашийн Монгол ногоон, амьд, амьсгалж буй улс байх болно.