Он солигдсоны дараа улс төрийн хүрээнд халаа сэлгээ, хариуцлага тооцох асуудал эрчимжиж эхэлнэ. Засгийн газрын түвшний өөрчлөлтийн араас нийслэлийн удирдлагад ч томоохон өөрчлөлт ойртож буй талаар мэдээлэл улс төрийн хүрээнд хүчтэй яригдаж байна. Хотын дарга Х.Нямбаатар орлогч нараа өөрчилж, НИТХ-ын удирдлагад ч шинэчлэл хийх боломжтой тухай эх сурвалжууд үгүйсгэсэнгүй.

Хотын удирдлагад хийгдэх өөрчлөлт: Хэн явж, хэн үлдэх вэ?

Хотын дарга Х.Нямбаатарын одоогийн хоёр орлогч болох эдийн засаг, дэд бүтцийн асуудал хариуцсан нэгдүгээр орлогч Т.Даваадалай, Ногоон хөгжил болон агаарын чанар хариуцсан хоёрдугаар орлогч А.Амартүвшин нар нь халаа сэлгээнийх нь гол байгаар нэрлэгдээд байна. 

• Т.Даваадалай явах уу үлдэх үү???

Т.Даваадалай нь инженер мэргэжилтэй бөгөөд 2021–2024 онд “Бодь” группийн харьяа байгууллагуудад гол төслүүд дээр ажиллаж байсан. Тэрээр томилогдоод удаагүй ч эдүгээ чөлөөлөх асуудал хөндөгдөөд буй. Гэвч үүнтэй зэрэгцэн нэг том сорил бий. Нийслэлийн Засаг даргын Тамгын газар болон “Бодь” группийн хамтарсан том төслүүд...

Тухайлбал:

• “Бөөрөлжүүт”-ийн 600 мВт-ын цахилгаан станцын төсөл,

• “Урт цагаан” буюу Нийслэлийн өмчийн 3-р байрны дахин төлөвлөлт,

• Метро төслийн бэлтгэл ажлууд гэх мэт.

Эдгээр төсөлд “Бодь” группийн оролцоо ихтэй учир Т.Даваадалайг чөлөөлөх нь төслийн уялдаа холбоонд нөлөөлөх эрсдэлтэй гэж үзэх байр суурь ч байна. Гэсэн ч улс төрийн хувьд солих асуудлыг ярилцсаар байгаа нь анзаарагдав.

• А.Амартүвшин: Улс төр, хууль хүчний байгууллагын сүүдэр

Хоёрдугаар орлогч А.Амартүвшингийн хувьд улс төрийн дэмжлэг, удам судрын нөлөө анхаарал татдаг. Тэрээр бригадын генерал Ц.Амгаланбаярын хүү бөгөөд түүний эцэг өмнө нь албан тушаалаа урвуулан ашигласан асуудлаар шалгагдаж байсан түүхтэй. Үүний улмаас орлогчийг солих асуудал илүү эрчтэй яригдаж байгаа гэх мэдээлэл цөөнгүй.Хотын даргын орлогчийг солих эрх мэдэл 100 хувь даргад байдаг тул энэхүү өөрчлөлт бодитой хэрэгжих магадлалтай гэж улс төрийн хүрээнийхэн үзэж байна.

НИТХ-ын даргад хийх өөрчлөлт: А.Баяр суудлаасаа буух уу?

НИТХ-ын дарга А.Баяр 2024 оны 10 дугаар сард олонхийн буюу 86.7 хувийн саналаар томилогдсон. Гэвч ердөө хэдхэн сарын дараа түүнийг солих асуудал хөндөгдөж эхэллээ. А.Баярыг Барилга, орон сууцжуулалтын сайд Э.Бат-Амгалангийн хүн, харин түүний оронд ирэх хүнийг Ерөнхий сайдын ойрын хүн гэж улс төрийн хүрээнд тодорхойлж байна. НИТХ-ын даргыг солих эрх нь НИТХ дахь МАН-ын бүлэгт бий. Хэрэв дотоод шийдвэр гарвал А.Баярыг өөр албан тушаалд шилжүүлэх хувилбар ч яригдаж байна.

МАН доторх хагарал: Нийслэлийн улс төрийг хөдөлгөсөн хүчин зүйл

       Өнгөрсөн саруудад МАН доторх хуваагдал, уралдаан хүчтэй өрнөсөн бөгөөд энэ үеэр Хотын дарга Х.Нямбаатарыг албан тушаалаас нь чөлөөлнө гэх мэдээлэл ч олон нийтэд түгээмэл болсон. Гэвч Х.Нямбаатарын Ерөнхийлөгчтэй уулзсаны дараах мэдэгдэл нь улс төрийн байр суурийг нь тодорхой болгосон. 

“Би МАН-ын даргад нэр дэвшихгүй.”

Энэ мэдэгдлийн дараа түүнийг нийслэлийн МАН-ын дарга, Хотын дарга зэрэг одоогийн албан тушаалд нь үлдээх тохиролцоонд хүрсэн гэж улс төрийн шинжээчид үзэж байна. 

ТОВЧХОДНОО: Шинэ оны дараах нийслэлийн улс төрийн зураг

     Нийслэлийн удирдлагад хийгдэх халаа сэлгээ нь зөвхөн албан тушаалын өөрчлөлт биш, харин МАН-ын дотоод зохион байгуулалт, бизнес, улс төрийн ашиг сонирхлын тэнцвэрт байдал, Ерөнхий сайдын багийн хүчний шинэчлэл зэргийг тод харуулж байна.

• Хотын орлогч нарын өөрчлөлт нь төсөл хэрэгжилт болон улс төрийн нөлөөллөөс хамаарч өөр өөр магадлалтай.

• НИТХ-ын дарга солигдвол энэ нь нийслэлийн бодлогын чиглэлд тодорхой өөрчлөлт авчрах боломжтой.

• Х.Нямбаатарын байр суурь түр тогтвортой болсон ч түүнийг тойрсон улс төрийн дарамт бүрэн арилаагүй.