Сүүлийн өдрүүдэд УИХ-ын чуулганы ирц огцом буурч, 126 гишүүнтэй парламент 60 хувийн босгыг давж чадахгүй болсон нь олон нийтийн анхаарлыг татаж байна. Өнөөдрийн нэгдсэн хуралдаан ердөө 64 гишүүн бүртгүүлж эхэлсэн нь 50.8 хувийн ирцтэй гэсэн үг. Гэвч бүртгэл хийлгэсэн гишүүдийн ихэнх нь танхимдаа бүрэн суухгүй байгаа нь нөхцөл байдлыг улам хүндрүүлж, УИХ-ын даргыг 10 минут тутамд гишүүдийг дуудан сануулахад хүргэжээ.

Ирцийн статистик: 10-р сар харьцангуй “өндөр” байсан нь

УИХ-ын Тамгын газраас өнөөдөр нийтэлсэн 10-р сарын ирцийн тайлан парламентын сахилга, хариуцлагын дүр зураг ямар байгааг тод харуулж байна.

10-р сард чуулганы нэгдсэн хуралдаан 6 удаа болсон бөгөөд:

• Хуралдаанаа огт таслаагүй гишүүн ердөө 52,

• Энэ нь нийт 126 гишүүний талд нь ч хүрэхгүй үзүүлэлт юм.

Тухайн үед МАН доторх албан тушаалын өрсөлдөөн ид өрнөж, улстөрийн халуун үйл явдлууд үргэлжилж байсан тул гишүүдийн идэвх харьцангуй өндөр байсан хэмээн ажиглагчид дүгнэж байна.

МАН-ын Их хурлын дараах уналт

     Харин 11-р сарын дундаас эхлэн ирц эрс муудсан нь МАН-ын Их хурлын дараах намжмал, завсарласан улс төрийн уур амьсгалтай холбоотой гэх таамаг бий. 11-р сарын албан ёсны ирцийн мэдээлэл хараахан нийтлэгдээгүй байгаа ч өнөөдрийн байдал болон өнгөрсөн долоо хоногийн хурдац нь парламентын ажил уналтын зурвас руу орсныг илтгэнэ.

Ирцийн асуудал – Хэн хариуцах вэ?

Парламентын хамгийн үндсэн үүрэг болох хууль тогтоох ажиллагаа гишүүдийн ирц, сахилга баттай шууд холбоотой. Ирц тасалдахаар:

• Хуулийн төсөл хэлэлцэх хугацаа хойшилдог

• Төсвийн болон томоохон бодлогын шийдвэрүүд саатдаг

• Иргэдийн төрд итгэх итгэл буурдаг

УИХ-ын даргын тасралтгүй “дуудлага” нь асуудал гүнзгийрснийг бататгаж байна.