Монголд эмнэлгийн хэрэгсэл, эм тарианы хяналт гэдэг зүйл цаасан дээр л “байдаг” гэдгийг бид өдөр бүр харж байна. Өнөөдөр жирийн иргэн “үр зулбуулах эм байна уу?”, “тарилга олдох уу?” гэж Facebook групп, Telegram чатад асуухад хэдхэн минутын дотор л худалдагч нь олдож, хүргэлттэйгээр ирдэг болсон. Энэ бол зүгээр нэг хууль зөрчих явдал биш  хүний амь нас эрсдэлд орж, эрүүл мэндийн тогтолцоонд итгэх итгэл бүрмөсөн нурж байгаа эмгэнэл.

Үр зулбуулах эм, гоо сайхны тариа, өвчин намдаагч, антибиотик гээд “хэрэглэвэл аюултай жагсаалт” бүгд гар дээрээс зарагдаж байна.

Бодит байдал: Хяналтгүй эм - Хяналтгүй үхэл

• Бүртгэлгүй, гарал үүсэл нь тодорхойгүй эм тариа
• Эмчийн заалтгүйгээр олгогдож буй эм

• Хууль зөрчсөн худалдаа ил байгаа ч, хариуцлага хүлээж байгаа хүн нэг ч алга.Энэ бүхэн бидэнд юу хэлж байна вэ?

Хяналтгүй улс орон, хариуцлагагүй тогтолцоо, эрүүл мэндийн салбар уналтад орсон гэх үнэн.

Иргэд яагаад ийм эрсдэл рүү алхаж байна вэ?

✅ Эмнэлэгт очиход эмчилгээ үнэтэй.
✅ Эмчид үзүүлэхэд дараалал урт.
✅ Сэтгэлзүйн эмчилгээ байхгүй, үр хөндөх үйлчилгээ хууль, ёс суртахуун хоёрын дунд хавчигдсан.
✅ Хамгийн энгийн эм авахын тулд ч "жор" гэдэг хаалттай хаалга тулна.

Тиймээс хүмүүс эрсдэлээ өөрсдөө үүрэхээр шийдэж, хууль бус замыг “хурдан, хямд, амар” гэж сонгож байна.

Хяналтгүй эм гэдэг нь иргэдийн амь насны аюул. Төр хяналтаа алдах аваас, иргэд амь насаа өөрсдөө эрсдэлд оруулах шаардлагатай болно. Өнөөдөр Facebook-гээр, Telegram-гээр олдож буй эм маргааш нь шалтгаангүй өвчин, эмэнд дассан бие, бүрмөсөн сүйрэл болж хувирч мэднэ. Төрийн байгууллагууд үүнийг таслан зогсоох хэрэгтэй. Үгүй бол эрүүл мэндийн салбарын уналт, иргэдийн амь насны эрсдэл улам гүнзгийрнэ.