Иран–Израилийн мөргөлдөөн хурцдав

2025 оны 6-р сарын 13-ны шөнө Израиль улс Ираны цөмийн болон цэргийн байгууламжууд руу агаарын цохилт өгч, нөхцөл байдал хурцдав. Израилийн зүгээс эхлүүлсэн “Operation Rising Lion” нэртэй довтолгоонд нийт 200 гаруй дрон, пуужин ашиглагдсан бөгөөд Ираны Натанз, Исфахан, Фордоу зэрэг цөмийн объектууд хүнд гэмтсэн тухай албан эх сурвалжууд мэдээлжээ.

 

Хариу болгож, Иран улс Израилийн нийслэл Иерусалим болон Тель-Авив руу 100 гаруй баллистик пуужин, дрон илгээсэн бөгөөд Израилийн агаарын довтолгооноос хамгаалах систем (Iron Dome) олон цохилтыг саармагжуулсан ч зарим нь хотуудад хүрч, эвдрэл сүйтгэл үүсгэжээ.

Энэ үеэр Иранд 80 гаруй хүн амь үрэгдэж, 300 гаруй хүн шархадсан бол Израиль талд хүн амын хохирол бага байсан ч дэд бүтцийн эвдрэл гарсан байна.

 

Дипломат тал дээр НҮБ, АНУ, Европын Холбоо зэрэг олон улсын байгууллагууд хурцадмал байдлыг зогсоохыг уриалж байна. Ираны дээд удирдагч Али Хаменей Израилийн эсрэг “хатуу хариу” амлаж, нөхцөл байдал улам хурцдах магадлалтай болжээ.

 

Эх сурвалжууд: Reuters, Time, WELT International