“Шангрила-Улаанбаатар хотел” ХХК-ийн эзэмшлийн 185 орон сууцын үл хөдлөх хөрөнгийн татвар болох 6.9 тэрбум төгрөгийг улс хураан авлаа

“Шангрила-Улаанбаатар хотел” ХХК. Зочид буудал, гадаад худалдаа, өөрийн үл хөдлөх хөрөнгийг түрээслэх, худалдах чиглэлээр үйл ажиллагаа явуулдаг. Компани хувьцаа эзэмшдэг, гүйцэтгэх захирлаар нь Сингапурын иргэн Кристофер Понг Сию Сан (Phong Siew San) ажилладаг бөгөөд эцсийн өмчлөгч нь “М-Си-Эс”-ийн Ж.Оджаргал аж.

Сүхбаатар дүүргийн I хорооны нутаг дэвсгэрт үйл ажиллагаа явуулдаг “Шангрила-Улаанбаатар хотел” ийг тус дүүргийн Татварын хэлтсийнхэн их хэмжээний татвар төлөх ёстой гэж үзсэн байна. Тодруулбал, “Шангрила” зочид буудлын зарим өрөө нь орон сууц байдаг. Түүнийгээ худалддаг, заримыг нь түрээсэлдэг. Тэгвэл тус компанийн шүүхэд гаргасан нэхэмжлэлд дурдсанаар орон сууцын зориулалттай 185 үл хөдлөх хөрөнгө “Шангрила” зочид буудалд бий гэнэ. Уг нэхэмжлэлд “Шангрила-Улаанбаатар хотел” ХХК-ийн өмчлөх эрхийн улсын бүртгэлийн гэрчилгээтэй, орон сууцын зориулалттай нийт 185 үл хөдлөх эд хөрөнгөд 2016-2020 онд хууль бусаар ногдуулсны улмаас үндэслэлгүй хураасан зургаан тэрбум есөн зуун арван сая гурван зуун жаран есөн мянга найман зуун дөчин хоёр төгрөг тавин зургаан мөнгө (6 910 369 842.56)-ний татварыг оны албан татварын төлөлтөд шилжүүлэн тооцуулахыг Сүхбаатар дүүргийн Татварын хэлтэст даалгахыг шаардсан байна. Харин Шангрилла нь тухайн үл хөдлөх хөрөнгүүд нь татвараас чөлөөлөгдөнө гэдгийг шүүхээр тогтоолгохыг хүсжээ. 185 үл хөдлөх эд хөрөнгийг орон сууцын буюу хүн амьдран суух зориулалтаар ашигладаг бөгөөд эдгээрийг бусдад хөлслүүлэн, үйл ажиллагааны орлогоор тайлагнан, орлогын албан татварыг хуулийн дагуу ногдуулан төлдөг. Харин дээрх төлсөн татвар нь Үл хөдлөх эд хөрөнгийн албан татварын тухай хуулийн 7.1.2-т заасны дагуу татвараас чөлөөлөгдөх зориулалттай боловч тус татварын газар болон харьяа дүүргийн татварын албанаас хуулийн дээрх зохицуулалтыг илт буруу, өргөжүүлэн тайлбарлан хэрэглэж, чөлөөлөлтөд хамруулахаас татгалзаж байгаа нь үндэслэлгүй. Бид орон сууцын менежментийг авч явдаг бөгөөд менежментийн төлбөр буюу “Сууц өмчлөгчдийн холбоо”-ны төлбөрийг орон сууц хөлслөх хөлснөөсөө тусад нь салгаж, хөлслөгчөөсөө авдаг. Учир нь бид менежментийн төлбөр буюу “Сууц өмчлөгчдийн холбоо”-ны төлбөрөөс нэмэгдсэн өртгийн албан татвараа төлдөг. Зочид буудлын тухайд тусдаа үйл ажиллагаа, гэрчилгээтэй, хүн богино хугацаанд амьдрах зориулалттай, харин орон сууц нь хүн удаан хугацаагаар амьдрах зориулалттай гэдгийг ялгаж ойлгох нь зүйтэй” хэмээжээ.

"ШҮҮХ ТАТВАРААС ЧӨЛӨӨЛӨХ ОРОН СУУЦ БИШ ГЭЖ ДҮГНЭЖЭЭ"

Аж ахуйн нэгж нь үндсэн хөрөнгийн элэгдэл, хорогдол, засвар үйлчилгээ, ашиглалтын зардлыг татвар ноодох орлогоос хасаж тайлагнадаг бөгөөд энэ тохиолдолд орлого олох зорилгоор ашиглаж байгаа тул татвараас чөлөөлөгдөхгүй гэх дүгнэлтийг гаргажээ. “Шангрила-Улаанбаатар хотел” ХХК-ийн итгэмжлэгдсэн төлөөлөгч Б.Мягмардорж, Э.Уянга, Э.Гэрэл нар дахиад шүүхэд хүсэлт хүргүүлсэн байна. Шинээр илэрсэн нөхцөл байдлын улмаас хянуулахаар гаргасан уг хүсэлтийг Улсын дээд шүүхийн Захиргааны хэргийн танхимын шүүх бүрэлдэхүүн энэ оны нэгдүгээр сарын 28-нд хэлэлцээд түүнийг нь хүлээн авахаас татгалзжээ. Ингэхдээ Захиргааны хэрэг шүүхэд хянан шийдвэрлэх тухай хуулийн 131.1.1-д заасан “Шүүхийн шийдвэр гарах үед хэргийн оролцогчид мэдэгдээгүй болон мэдэгдэх боломжгүй байсан нотлох баримт илэрсэн” гэж үзэхгүй гэж дүгнээд хүсэлтийг хангахаас татгалзсан аж. Ингэснээр “Шангрила-Улаанбаатар хотел” ХХК-ийн эзэмшлийн 185 орон сууцын үл хөдлөх хөрөнгийн татвар болох 6.9 тэрбум төгрөгийг улс хураан авсан байна.