Сонгуулийн үеэр улс төрийн намууд гоё сайхан мөрийн хөтөлбөр танилцуулж, иргэдэд олон амлалт өгдөг. Харин сонгуулийн дараа тэдгээр амлалтууд бодит ажил хэрэг болж, иргэдийн амьдралд бодит өөрчлөлт авчирч чадаж байна уу гэдэг асуулт нийгэмд байнга хөндөгдсөөр байна. Иргэдийн зүгээс төрийн байгууллагууд төсвийн хөрөнгийг үр ашигтай, хариуцлагатай зарцуулах ёстой гэсэн хүлээлт өндөр байдаг. Гэвч бодит байдал дээр зарим хөрөнгө оруулалт, зардлууд нь нийгмийн зайлшгүй хэрэгцээ шаардлагад нийцэж байна уу, эсвэл тансаг, үрэлгэн шинжтэй байна уу гэх шүүмжлэл тасрахгүй байна.Монгол Улс эдийн засгийн хувьд олон сорилттой тулгарч буй энэ үед төсвийн хөрөнгө оруулалт бүр иргэдийн амьдралд шууд нөлөөлөх, бодит үр өгөөжтэй байх шаардлагатай. Спорт, соёл, олон улсын сурталчилгаа зэрэг салбарын бодлого ч мөн адил ил тод, тооцоо судалгаанд үндэслэсэн байх нь чухал. Жишээлбэл, зарим тамирчид, уран бүтээлчид, залуус төрийн шууд дэмжлэггүйгээр олон улсын тавцанд Монгол Улсаа амжилттай сурталчилж, эерэг имидж бүрдүүлж байна. Ийм бодит амжилтуудыг бодлогын түвшинд хэрхэн дэмжих, урамшуулах вэ гэдэг нь анхаарах асуудал юм. Нөгөө талаас, гадаад сурталчилгаа, олон улсын хамтын ажиллагаанд зарцуулж буй төсөв нь урт хугацаанд улс орны нэр хүнд, аялал жуулчлал, эдийн засагт бодит өгөөж авчирч байгаа эсэхийг нээлттэй тайлагнах шаардлага бий. Ардчилсан нийгэмд төр бол иргэдийн төлөөлөл. Иргэд бол жинхэнэ эзэд, харин төрийн албан тушаалтнууд бол тэдний өмнөөс ажил гүйцэтгэх үүрэг хүлээсэн төлөөлөгчид. Иймд сонгогдсон албан тушаалтнууд мөрийн хөтөлбөрөө хэрэгжүүлэх, амлалтаа биелүүлэх нь улс төрийн ёс зүй, хариуцлагын үндсэн шалгуур юм.

    Харин иргэдийн зүгээс ч хяналт тавих, мэдээлэл шаардах, оролцоогоо нэмэгдүүлэх нь чухал. Ил тод байдал, тайлагнал, олон нийтийн хяналт сайжирснаар төсвийн үр ашиг, бодлогын чанар дээшлэх боломжтой. Цаашид эрх барьж буй намаас асуух ганц чухал асуул бий. Монгол Ардын Нам мөрийн хөтөлбөрт тусгасан ажлуудыг хэзээ, хэрхэн бодитоор хэрэгжүүлж, иргэдэд хүргэх вэ?

Иргэдийн хүлээлт бол энгийн:

• Амлалтаа биелүүлэх

• Төсвийн хөрөнгийг хариуцлагатай зарцуулах

• Нийгмийн зайлшгүй хэрэгцээнд нийцсэн бодлого хэрэгжүүлэх

• Ил тод, тайлагналтай ажиллах

Сонгуулийн амлалт бодит ажил болон хэрэгжиж, иргэдийн амьдралд мэдэгдэхүйц өөрчлөлт авчирсан цагт л итгэл сэргэнэ. Харин энэ хүртэл иргэдийн асуулт, шаардлага, хяналт бодитой үргэлжилдэг байх нь ирэх сонгуулийн өнгийг тодорхойлохоос гадна ирэх жилүүдийн Монгол Улсын хувь тавиланг шийдэх биз ээ.