Ц.Санжаачойпэлийг өнөөдөр суллах байсан ч дахин 30 хоног хорихоор шийдвэрлэв

       Бусдын биед хүнд гэмтэл учруулсан, мансууруулах бодис хэрэглэсэн, олон нийтийг үл хүндэтгэж танхайрсан хэргийн яллагдагч Ц.Санжаачойпэлийн цагдан хорих хугацаа өнөөдөр дуусахтай холбоотойгоор өнгөрсөн долоо хоногт өмгөөлөгч нарынх нь хүсэлтийн дагуу уг арга хэмжээг өөрчлүүлэх хүсэлтийг Дүүргийн эрүү, иргэний хэргийн хялбар ажиллагааны анхан шатны тойргийн шүүхэд хэлэлцсэн юм. Улмаар тус шүүхийн шүүгч Н.Одонтуул “Хуульд заасан аль үндэслэлээр цагдан хорих таслан сэргийлэх арга хэмжээ авах тухай огт дурдаагүй байх тул шүүх өмнөх цагдан хорьсон үндэслэл арилаагүй гэж дүгнэх боломжгүй байна. Шүүхийн хэлэлцүүлэгт “АНУ-ын визтэй тул оргон зайлах үндэслэлтэй” гэх тайлбар гаргасныг хүлээн авч, цагдан хорих таслан сэргийлэх арга хэмжээний хугацааг сунгах үндэслэлгүй” гэж дүгнэсэн. Ингэснээр Ц.Санжаачойпэлийг энэ сарын 28-нд буюу өнөөдөр батлан даалтад гаргаж суллах байв. Шүүгч Н.Одонтуулын уг захирамжийг Сүхбаатар дүүргийн Прокурорын газрын хяналтын прокурор үндэслэлгүй гэж үзэн дээд шатных нь буюу тус шүүхийн ерөнхий шүүгч Б.Халиунд гомдол гаргасан аж. Уг гомдлыг нь өчигдөр хэлэлцээд “Шүүгчийн захирамж нь хууль ёсны үндэслэлтэй байх хуулийн шаардлагыг хангаагүй. Өөрөөр хэлбэл урьд цагдан хорих таслан сэргийлэх арга хэмжээ авсан үндэслэл арилаагүй байхад прокурорын саналыг хүлээн авахаас татгалзсан нь хууль зүйн үндэслэлгүй, хуульд нийцэхгүй байх тул прокурорын гаргасан гомдлыг хангаж, тус шүүхийн 2025 оны наймдугаар сарын 21-ний 2025/ЦХШЗ/2550 дугаар шүүгчийн захирамжийг өөрчилж, яллагдагч Ц.Санжаачойпэлд авсан цагдан хорих таслан сэргийлэх арга хэмжээг нэг сарын хугацаагаар сунгаж шийдвэрлэв” гэсэн захирамж гаргалаа. УИХ-ын гишүүн асан, “GEM групп”-ийн эзэн, улсын гарди Ц.Цэрэнпунцагийн хүү Санжаачойпэл, хууль тогтоогч асан, “Эрэл” ХХК-ийг үүсгэн байгуулагч Б.Эрдэнэбатын хүү Тэмүүлэн, “Таван богд групп” ХХК-ийн Ц.Баатарсайханы хүү, “Говь” ХК-ийн гүйцэтгэх захирал Амарсайхан, УБТЗ-д ажиллаж байгаад тэтгэвэртээ гарсан хүний хүү Л.Алтан-Очир нар хамтарч иргэн Д.С-г долоодугаар сарын 18-19-нд шилжих шөнө зодож хүнд гэмтээсэн, мансууруулах бодис хэрэглэсэн, олон нийтийн амгалан тайван байдлыг алдагдуулж танхайрсан гэх үндэслэлээр яллагдагчаар татагдсан билээ.